Nae git ootay here,
ye plukey-faced wanker!

miðvikudagur, nóvember 29, 2006

Vissir þú...

...að stærsta umhverfisvandamál sem heimurinn stendur frammi fyrir er af völdum orkunotkunar?

...að í Bretlandi er 34% af rafmagni framleitt með kolum, 37% með gasi, 20% með kjarnorku og aðeins 5% með endurnýjanlegri(vistvænni) orku?

...að eftir 15 ár verða 15 af 16 kjarnorkuverum Breta úreld og um 20% kolavera og að gasbyrgðir í Norðursjó eru að klárast(þegar flytja þeir inn 50% af gasi)?

...að það tekur 10 ár að byggja kjarnorkuver?

...að vistvæn orka nær engan vegin að brúa þetta bil til að anna orkuþörf eftir 15 ár?

...að stjórnvöld eru enn að ákveða hvaða leiðir eigi að fara til þess leysa þetta vandamál, þrátt fyrir að eftirspurn eftir orku mun líklega aukast um 10-15% næstu 15 árin?

...að 30% af öllu rafmagni sem er notað á heimilinu fer í kæliskápinn, og að þú getur lækkað þetta hlutfall með því að loka hann ekki af?

...að það mætti spara eitt orkuver ef allir Bretar myndu slökkva alveg á sjónvarpstækjunum, ekki bara með fjarstýringunni?

...að á líftíma sjónvarpstækis notar það aðeins 30% af rafmagninu meðan það er kveikt á því, ef að það er alltaf bara slökkt með fjarstýringunni?

...að Íslendingar eru svo heppnir að hafa næga orku til þess að mæta orkuþörf allra landsmanna og rúmlega það og hafa því ekki miklar áhyggjur af því hvernig þeir munu kynda húsin eða lýsa húsin eftir 20 ár?

...að nær allt rafmagn á Íslandi er framleitt með endurnýjanlegri(vistvænni) orku?

...að þú ert búin/búinn að lesa 11 staðreyndir um orku?

...að þú ert enn að lesa, en ekkert sem veitir þér upplýsingar af neinu viti?

...að þú hefðir átt að hætta að lesa tveimur staðreyndum ofar því að þessi er bara bull?

...og þessi líka...

...og þessi.

Langaði bara að deila þessu með ykkur.
:: posted by Daniel, 7:44 e.h. | 4 comments |

þriðjudagur, nóvember 28, 2006

Bölvunin

Var á leiðinni fyrr í kvöld, jább þú giskaðir rétt í strætó, allt merkilegt virðist gerast þar. Allavega var ég fara að keppa handboltaleik. Allt í einu fann ég þessa þvílíku stybbu. Lyktin var eiginlega ólýsanleg, minnti helst á furðulega málningu.Ég bölvaði gaurnum fyrir framan mig í huganum, hver fer svona illa lyktandi í strætó?
Þegar ég var að skipta um föt í íþróttahúsinu fann ég að vonda lyktin var ennþá. Þá uppgötvaði ég að hún kom úr hliðarvasanum á íþróttatöskunni. Þegar ég opnaði vasann varð lyktin nær óbærileg, þvílíka lyktargusan sem kom framan í mig. Í vasanum var eldgamall banani sem var búinn að tapa öllum gula litnum. Hann er búinn að vera þarna í rúmar tvær vikur.
Mig grunar að Líbanarnir séu þarna að verki...
:: posted by Daniel, 10:23 e.h. | 1 comments |

Allir í strætó

Nær alltaf þegar maður tekur strætó úr skólanum seinni part dags líður manni eins og síld í tunnu því að þetta er sá tími sem flestir fara heim. Þá þekjast gluggarnir af móðu og loftið verður þungt og viðbjóðslegt. En Skotar eru ekkert að stressa sig á því að opna gluggana. Lenti í því um daginn að ein dirfðist til þess en þá var gaurinn fyrir aftan hann ekki lengi að skella honum aftur. Skotar eru víst frekar nískir og opna aldrei gluggana heima hjá sér til þess að hleypa fersku lofti inn því að um leið hleypa þeir heitu lofti út úr húsinu. Við þessar þröngu aðstæður á ég það iðulega til að verða bílveikur, sérstaklega þegar næsti maður við hliðna á mér angar eins og kaldar franskar eða indverskt karrímix. Því kem ég oft heim úr skólanum fullur af ógleði og hausverk ...af því að Skotar vilja hafa gluggana lokaða.
:: posted by Daniel, 5:27 e.h. | 0 comments |

sunnudagur, nóvember 26, 2006

Leiðinlegt fólk

Mér leiðst fólk sem kaupir miða á tónleika sem það ætlar ekki á þá ekki á heldur kaupir bara miða til þess á selja þá á ebay til þess að græða...

Mig langar á Damien Rice í mars.
:: posted by Daniel, 11:22 e.h. | 0 comments |

Lí-Bananar

Dr. Tsénge Sú er Kínverji sem kennir mér raforkukerfi í skólanum. Það eru engir eignlegir tímar heldur hittumst við einusinni í viku til að skila dæmum og fá svör við spurningum. Í faginu eru u.þ.b. 10 strákar, þar af 3 menn frá Líbíu. Mennirnir eru allir í kringum fertugt og mingla ekkert við aðra í bekknum, brosa bara þegar einhver of okkur hinum 7 heilsar þeim.
Eitt skiptið þurfti ég að hitta á Dr. Sú á skrifstofu hans. Þá sagði hann mér frá því að Líbíumennirnir væru í algeru rugli og hefðu ekki skilað neinu. Mér þótti það ekkert koma mér við, eiginlega bara óviðeigandi að hann væri að segja mér frá þessu þannig að ég brosti bara um leið og ég kvaddi.
Í næsta tíma segir Dr. Sú við Líbanana (segir maður það? eða frekar þegar maður er frá Líbanon?) fyrir framan allan bekkinn að þeir þurfi að fara að taka sig á því að fyrsta heimadæmið sem þeir hafi skilað hafi allt verið vitlaust...enn og aftur frekar óviðeigandi.
Í síðustu viku voru 3amigos ekki mættir og tilkynnir Dr. Sú okkur að Líbananarnir (þetta er alveg eins og banani bara L og Í fyrir framan, rasistar sem mótuðu málið okkar!) væru hættir og að framvegis verði þetta mun þægilegra og skellihlær, eins og við vissum allir hvað hann ætti við því að framvegis geti hann svarað spurningum frá fólki sem er á svipuðum stað í námsefninu.

Kannski eru félagarnir bara svona lélegir í raforkukerfum eða kannski bara hreinlega latir? Önnur ástæða gæti verið að þeir séu bara alls ekki mættir hingað til þess að læra heldur bara til þess að komast inn í landið í þeirri von að öðlast betra líf...
:: posted by Daniel, 11:00 e.h. | 0 comments |

fimmtudagur, nóvember 23, 2006

Oh what a beautiful morning

Vaknaði í morgun við gól fram á gangi. Það var einhver 2 hæðum fyrir neðan að syngja hástöfum. Ég varð pirraður út í gaurinn. Ekki af því að hann vakti mig heldur af því að ég öfundaði hann fyrir að vera svona morgunhress. Ég var nefnilega búinn að snúsa í tæpan klukkutíma. Gaurinn er búinn að vera syngjandi í allan morgun á meðan ég læri. Þetta er bara nokkuð vinalegt að hafa svona söngvara í byggingunni, verst að þetta mun ekki vara lengi því að ég held að hann sé að vinna ásamt nokkrum öðrum við að gera upp íbúð 5 og því fer senn að ljúka.
:: posted by Daniel, 11:48 f.h. | 2 comments |

miðvikudagur, nóvember 22, 2006

Shaken or stirred sir? Do I look like I give a damn!

Fór á nýju Bond myndina Casino Royale. Ég var fullur efasemda fyrir myndina því að mér hefur þótt James Bond leikinn af Brosnan frekar mikil klisja. Þar að auki leist mér ekkert betur á nýja leikarann Daniel Craig.
Myndin kom mikið á óvart og var ég nokkuð sáttur við útkomuna, kannski ég sjái bara næstu Bond mynd líka í bíó.
:: posted by Daniel, 7:17 e.h. | 0 comments |

mánudagur, nóvember 20, 2006

Alveg magnað

Var á barnum um daginn. Frábær bar þar sem bjórinn kostar 1,5 pund og gin&tonic 1 pund. Svo er meira að segja fússballborð á staðnum. Hvað meira þarf maður. Anyways þá hitti ég Christian, Þjóðverjann sem æfir handbolta með mér. Með honum voru leigufélagar hans í góðu fjöri. Hann kynnti mig fyrir Kjetil, norskum gaur. Þegar Kjetil fréttir að ég sé íslenskur hoppar hann hæð sína og á ekki orð til að lýsa gleði sinni. Hann hleypur á barinn kemur til baka með g&t handa mér svo fer hann að lýsa aðdáunn sinni á Íslandi og hvað ísland sé kúl og allt það. Honum gramdist mikið að Danir hefðu rænt okkur af þeim. Svo berst talið að tungumálum, hann bað mig um að segja eitthvað á íslensku, sem ég geri gegn vilja mínum. Hann varð undrandi en um leið gríðarlega glaður og sagði "þetta er ótrúlega, ég skil hvað þú ert að segja, þetta er alveg eins og forn norska. Magnað". En ég vissi það auðvitað en þóttist mjög hissa. Ég hafði það bara ekki í mér að segja honum að Íslendingum þykir fátt svalt við Noreg, að Noregur sé eiginlega bara frekar lummó. Nema auðvitað norsku peysurnar, þær eru töff...
:: posted by Daniel, 1:41 e.h. | 0 comments |

sunnudagur, nóvember 19, 2006

Celebrate good time common!

Ég held að ég sé að fara að vinna 2 kippur af bjór.

Ætla að halda upp á það með því að drekka expressó, borða ís og fá mér svo bjór á meðan ég góni á Trainspotting...
:: posted by Daniel, 9:53 e.h. | 0 comments |

Allir í Sleik!

Er með gesti hjá mér þessa stundina. Þeir eru ekki af verri endanum því að þetta eru engir aðrir en Stiffster og Pink fyrrum ferðafélagar. Eins og ungu hressu fólki sæmir þá skelltum við okkur í góðra vina hópi út á lífið. Kvöldið byrjaði nokkuð eðlilega nema að fólki gekk frekar illa að finna á sér þrátt fyrir þónokkra drykkju. Smám saman færðist kvöldið útfyrir hinn hefðbundna ramma. Eftir nokkur skot og ginglös var haldið stórann 4 hæða klúbb þar sem mismunandi stemming ríkir á hverri hæð. Við enduðum á hæð sem ber nafnið Pravda því að þar höfðaði tónlistin mest til okkar. Við keyptum drykki og fengum okkur sæti. Áður en við vissum af höfðu tvær vinkonur plandað sér beint fyrir framan borðið okkar og hófu að kyssast. Í u.þ.b. hálftíma stóðu þær þarna í sleik, káfandi á hvor annari. Þetta vakti mikla kátínu hjá starfsmönnum og karlkyns gestum staðarins. Smám saman voru þær komnar með stóran áhorfendahóp án þess að kippa sér mikið upp við það. Ekki einusinni þegar einn gaur ætlaði að skora stig hjá félögunum og sló á rass einnar þeirra virtist vekja nein viðbrögð. Það var þá sem okkur grunaði þær um græsku, þetta voru engar lesbíur heldur bara vinkonur að sýnast.
Þegar ástarlotum vinkvennanna lauk héldum við á dansgólfið. Þar var heldur þröngt, en það truflaði lítið 3 feitar vikonur (eða mæðgur) því að þær bara hrintu öllum sem nálguðust þær frá sér með sínum ofvöxnu rössum. Ein gerði sig líklega til þess að ráðast á Hlínsu sem náði að forða sér í tæka tíð. Stuttu síðar brutust út slagsmál milli einnar vinkonunnar og einhverrar gellu. Hár var rifið og neglur læstar í andlitum meðan aðrir reyndu að stíja þeim í sundur. Þegar það lokst tóks hoppaði feita vinkona og hló og hélt áfram að dansa eins og hún hefði aldrei skemmt sér eins vel...við fengum nóg af dansi og fengum okkur einn drykk og héldum heim á leið...spes kvöld.
:: posted by Daniel, 1:35 e.h. | 1 comments |

miðvikudagur, nóvember 15, 2006

Bad Hair Day

Lét loks verða af því að fara í klippingu hérna úti. Hef einu sinni áður farið í klippingu í útlöndum og gaf sú klipping ekki góða raun. Reyndar var það þegar ég og Stebbi Stiff tókum þá skyndiákvörðun að skella okkur í klippingu í Trujillo í Perú. Vond ákvörðun. Stebbi kom út með hárið sleikt til hliðar og ég get ekki lýst því hvernig ég var því að konan sem klippti mig virtist bara gera eitthvað. Hefði örugglega komið betur út að nota klippisugu, þið vitið klippigræjan sem þið setjið á ryksuguna. Eftir þetta hef ég forðast að klippa mig annarsstaðar en á Íslandi eins og heitann eldinn.

Hárið á mér eins og það var í gær hefði sómað sér vel á tímum diskós eða glysrokks. Eftir talverðar vangaveltur ákvað ég að panta mér tíma hjá rakarastofu . Ég mætti mjög úldinn í morgunsárið, frekar ryðgaður eftir tónleikana kvöldið áður. Ég hafði ekkert miklar áhyggur af því sem gellan sem klippti mig var að gera, hún virtist nokkurnvegin vera með á hreinu hvað hún væri að gera. Allavega meira á hreinu en ég. Loks þegar hún var búin að klippa þá setur hún einhvern viðbjóð í hausinn á mér. Eitthvað sem minnti mig á blauta steypu sem þornar fljótt. Ég var með lokuð augun á meðan hún blés og greiddi mér. Þegar hún var búin opnaði ég þau aftur og við mér blasti andlitið á mér með hárhjálm (hairhelmet) ofan á, ekki töff. Ég nánast hljóp alla leiðina heim og reyndi að telja mér trú um að kannski væru hárhjálmar bara nokkuð töff en ég sannfærðist ekki. Um leið og ég kom heim skolaði ég viðbjóðinn úr hausnum á mér og greiddi mér upp á nýtt. Hún virðist hafa klippt mig ágætlega því að nýja greiðslan gerði gæfumun og átti ekkert skylt við áðurnefndan hárhjálm. Núna er ég bara nokkuð töff.
:: posted by Daniel, 10:25 e.h. | 1 comments |

Robotman

Var að koma af tónleikum með hljómsveit sem myndi þýðast á íslenska tungu sem Geimvera. Hefði átt að vera á handboltaæfingu og sé eiginlega eftir því að hafa sleppt henni fyrir geimveruna, nefnilega leikur á laugardaginn. Veit samt ekkert við hverja. Tónleikarnir fóru fram á Cabarett Voiltare sem er í kjallara í gamla bænum. Tónleikasalurinn er eins og stór kennslustofa en af því að allir standa þá sér maður eiginlega ekki neitt. Hver myndi sjá á töfluna í kennslustofu ef hún væri troðfull? Mér skyldist að ég væri að fara að hlýða á eitthvað mix af indí og funki en raunin varð eitthvað tilraunakennt progrokk. Nokkur lög voru áheyranleg og minntu jafnvel á Pink Floyd en önnur voru bara haugur af skít eða load of crap eins og við segjum hér. Eitt lagið innihélt einungis textann "Robotman" mjög skemmtilegt.

Það besta við tónleikana var að söngvarinn var alveg útúr því og bullaði mikið á milli laga, reyndar stundum full mikið. Eftir 3 lög þá bað hann eitthvað fólk sem stóð fremst vinsamlegast að færa sig aftast því að hann gæti ekki haldið almennilega tónleika ef að fremsta fólkið væri að geyspa og tala saman á meðan. Eftir að hafa röflað í því í 10 mínútur gafst útúrþví söngvarinn upp og næsta lag byrjaði. Það sem var frekar súrt var að hljómsveitin var ekkert að fíla framkomu söngvarans og beið bara sviplaus eftir því að söngvarinn héldi kjafti svo að næsta lag gæti byrjað...

...ég hefði bara átt að fara á handboltaæfingu og sleppa því að ljúga að þjálfaranum að það væri svo mikið að gera í skólanum að ég kæmist ekki.

Swammbúmmogút
:: posted by Daniel, 12:45 f.h. | 0 comments |

mánudagur, nóvember 13, 2006

Að sigra heiminn er eins og að spila á spil
með spekingslegum svip og taka í nefið.



Er með einum indverja í bekk. Ég veit ekkert hvað hann heitir af því að ég skil aldrei hvað hann er að segja. Alltaf þegar ég tala við hann þá enda ég á því að byðja hann að endurtaka allt að minnsta kosti 4 sinnum áður en ég gefst upp á tek upp "brosa og kinnka kolli" aðferðina.

Tók strætó í skólann í morgun. Þegar ég gekk inn sá ég að það voru laus sæti aftast á neðri hæðinni. Þegar ég er að setjast niður sé ég að indverjinn situr einu sæti frá mér að lesa blað, bara eitt sæti á milli okkar. Ég heilsa honum og hann lítur upp frá blaðinu. Það fyrsta sem hann gerir er að færa sig í sætið sem var á milli okkar. Við byrjum eitthvað að spjalla saman um skólann, allavega ég, veit ekki alveg hvað hann var að tala um. Heyrði hann allavega minnast eitthvað á heimadæmi. Þegar spjallið er að fjara út og ég byrjaður að brosa og kinnka kolli ákveð ég að spyrja hann hvernig helgin hafi verið hjá honum, hvort hann hafi farið eitthvað út. Hann svara nei því að hann hafi verið svo þreyttur eftir síðustu viku. Ég hugsa með mér, er ég bara í einhverju rugli í skólanum, læri bara stundum á kvöldin og tek alltaf frí allvega einn dag um helgar...eða kannski er hann bara að massa þetta, fær 10 í öllu. Eftir vangavelturnar fatta ég að gaurinn hafði ekkert hætt að tala og ég reyni að koma mér aftur inn í samræðurnar (eða mónólóginn sem var í gangi) en næ bara einu og einu orði af því sem vellur upp úr gaurnum. Það litla sem ég skildi var "...to much work...". Gaurinn er semsagt að vinna með skólanum á bensínstöð og vinnur 3-4 8klst vaktir í viku til að fjármagna námið. Og ég sem vorkenndi sjálfum mér fyrir að þurfa að eyða of miklum tíma í að læra og að ég hafi of lítinn tíma til að skemmta mér...


Og þótt þú tapir, það gerir ekkert til,
því það er nefnilega vitlaust gefið.

Steinn Steinarr
:: posted by Daniel, 11:57 e.h. | 2 comments |

fimmtudagur, nóvember 09, 2006

Sirkusfrík

Var í strætó á leið í skólann í morgunn. Lét hugann reika meðan strætóinn hélt leið sinni áfram og stoppaði reglulega og hleypti fólki inn og út. Stundum flýgur hugurinn á fjarlæga staði og stundum að fólkinu í kringum mann. Stundum fær maður bara furðulegar hugmyndir. Ég starði upp í himininn í gegnum gluggann og var eitthvað að hugsa um heimadæmi sem ég á að vera búinn að skila, strætó stoppar og ég lít niður og sé að tvær heldri, frekar fínar frúr, eru að ganga um borð. Ég lít á aðra þeirra og mér sýnist hún vera eitthvað skítug á efri vörinni. Þegar hún nálgast mig og gengur fram hjá mér sé ég að hún er bara með yfirvaraskegg. Ekki bara nokkur hár eða þunnan hýjung, heldur þykka mottu eins og afi minn er með. Ég reyni að hemja furðusvipinn á andlitinu á mér og lít betur á hana til þess að fullvissa mig um að þetta sé örugglega kona en ekki klæðskiptingur að stæla Little Britain. Grunurinn reyndist réttur, þetta var bara fín eldri kona með mottu.

Þar hafiði það
:: posted by Daniel, 2:11 e.h. | 3 comments |

miðvikudagur, nóvember 08, 2006

Ekki dauður enn!

Neibb, ekki dauður eða dottinn í ruglið hér í Edinborg.

Það er bara helvítis fyrirtækið sem ætlar að skaffa mér net sem hefur tekið sér 6 góðar vikur að tengja það. Hringdi meira að segja í síðustu viku að reka á eftir og fékk þær upplýsingar að einhver starfsmaður hefði óvart afpantað netið hjá mér og ég þyrfti að bíða í viku í viðbót. Hef alveg bloggað fullt á meðan, það bara kemur ekki á netið af því að ég hef ekki verið tengdur...

Annars gafst ég upp í rúbbí. Fékk mig ekki til að mæta aftur eftir raunir fyrstu æfingarinnar. Einnig langaði mig ekkert aftur eftir að ég mætti á handboltaæfingu. Já þú last rétt það er handbolti í Skotlandi. Þar var ég eins og kóngur í ríki mínu með aragrúa af Frökkum og einum skota. Spilaði meira að segja einn leik eftir fyrstu æfingu. Við töpuðum. Frökkunum finnst gaman að skjóta á markið og gera það nokkurnvegin þegar þeim langar. Er samt sannfærður um að okkur gangi betur næst, eftir að hafa æft saman nokkrar æfingar.

Skólinn gengur svona eins og gengur. Er eiginlega aldrei í tímum, bara 5klst á viku í mesta lagi. Á bara að lesa allt sjálfur og skila verkefnum. Er mjög ánægður með þetta system nema að prófin eru í byrjun janúar. Þarf bara að fara að vakna fyrr á morgnanna þá daga sem enginn skóli er.

Í lokin langar mig til að drulla yfir strætóbílsstjórann sem bara keyrði fram hjá mér í morgun. Ég var að rölta fyrir hornið þar sem stoppustöðin er. Strætóinn er búinn að stoppa við hana en kemst bara 4 metra áfram út af rauðu ljósi (sem var nýkomið á). Ég labba að hurðinni og veifa til bílstjórans. Hann lítur ekki einusinni á mig og hristir bara hausinn, helv. fávitinn. Eftir c.a. hálfa mínútu þá keyrir hann áfram og um leið skvettast nokkrir lítrar af vatni yfir mig af götunni um leið og strætóhjólin keyra í poll...

...ókei ég er að ljúga með vatnið, en ég varð samt massa fúll.
:: posted by Daniel, 7:03 e.h. | 1 comments |